Tyn sóm umrził i … ożył

-Tóż czymu żeś mi nie doł znać, że Rysiek pisior mo pogrzyb? – dzwónił z pretynsjóm Tadek z Zybrzidowic zza Młyńszczoka w pyndziałek 27 grudnia 2021, pod wieczór. Przez świynta był u swojich w Kalymbicach i jak wracoł uwidzioł przi kościele klepsydre.

-Tóż mało chodzym po wsi – tłumaczył sie synior Zbyszek. -Rysiek Czyż, 78 roków, pogrzyb mo w środe 29 grudnia o dwanostej – usłyszoł detale.

Przijedzie minister

-To chyba minister Szwed przijedzie – wydedukowoł Tadek, bo przeca Rysiek tu w Zybrzidowic prowadził jego biuro. -A pamiyntosz jak w zómku na 85-urodzinach matki (r. 2018, nauczycielka i działaczka religijno Bronisława Brzezina) odczytoł list gratulacyjny od wiceministra Stasia Szweda? – No jasne, a było nas tam dobrze ponad stówka ludzi, ze starostóm, burmistrzym, wicewójtym, farożami i dziekanami – potwierdził Tadek.

-No to móm 2 pogrzeby – zareagowoł Zbyszek, we wtorek w Kóńczyc dalszego krewnego a we środe tyn w Zybrzidowic. Porozmyśloł kapke przed Tadeuszym nad Ryśkiym.

Formacja w Macierzy

-Ja, ón też gónił tu do lokalnej Macierzy Cieszyńskij do zómku to na jego pogrzyb przilezóm też te złośliwe platfusy. Tadeusz wiedzioł dobrze, że idzie o tych co w 2017 chcieli sie w sóndzie całóm bandóm zabawić kosztym Zbyszka (Francek i giermki Grzech z Bachóm i Antosiym, i insi), coby go zawczasu upierdo – – – przed wyborami, żeby im nie wskoczył na jaki stołek co sie im marzył. Zresztóm Zbyszek wiedzioł, że umrzity (i nie yno ón) przechodził u nich cwanóm indoktrynacje (w sumie dwupartyjnóm).

Przez pore roków jak PIS był w opozycji, Zbyszek chodził na ich zebrania. Podle tego co do niego dociyrało, jako dziynnikorz i podczas kampanii wyborczej robił dlo nich cosi pożytecznego. Ale jak doszli do władzy, to naszli sie tacy (ze dwóch kolesiów) co na niego szymrali, bo mieli w tym swój interes. Potwierdził to potym sóm wybrany wtedy starosta cieszyński.

To je tyn drugi

Uż w dziyń pogrzebu z rana Tadeusz dodzwónił sie do b. starosty cieszyńskigo Janusza Króla, z kierym sie zno od szkoły. Ważno persóna była zaskoczóno tóm żałobnóm wiadómościóm, a ku tymu uż yno na pore godzin przed pogrzebym. Tak w te pyndy broł sie do jego organizacji.

Tadeusz kołatoł do inszego jeszcze pisiora, coby sie dołónczyć do pogrzebowej ściepki na msze i wiyniec. Aż tu dobry kolega umrzitego to je Czesiek Biegun, też uż dziadek 70+, jak gróm z ciymnego nieba go… oświycił: – Tóż to je przeca tyn spod lasa z Nowej Cesty, kapke starszy, a nie nasz od kina.

Teraz bydzie żył dłógo

Tadeusz pierónym do starosty, ale sie ni móg dodzwónić, bo tyn uż zapewne działoł na hónym w sprawie pogrzebu dlo zasłużónego pisowca aż kansi ku ministertwu (podobno ze stolicy mioł startować helikopter). Kapke przed pogrzebym sie mu odezwoł. -To ni ma tyn, je jeszcze drugi – prostowoł zmiyszany Tadeusz. – No ja, to teraz bydzie żył dłógo … – zareagowoł roz jeszcze zaskoczóny starosta.

Dobrze że Zbyszek, fest zajynty nauczaniym online, kiery też mioł chynć sie wybrać w połednie na tyn pogrzyb i uż se załatwił kapke wolnego od szkoły – odebroł Tadka. -Chcym ci yno powiedzieć, że tak jak ty żeś naloz w swojij szkole dwie Lucyny Czaje z Zybrzidowic, tak je też dwóch Ryśków. I to je akurat tyn drugi co umrził …

Cooo – żyje?

Na drugi dziyń po pogrzebie uż wieczór Zbyszek zagadnół sztygara Marka o pogrzyb, choć mioł na myśli pogrzyb w Małych Kóńczyc ich dalekigo krewnego Bogdana, we wtorek. -No tóż joch go znoł. Ón tu był ważnóm osobóm z PISu, reprezyntowoł nawet wiceministra Szweda. Chyba pamiyntosz jak ze scyny czytoł jego list na jubileuszu matki – prawił poważnym głosym Marek.

-Wyhamuj. 2 godziny przed pogrzebym żech sie dowiedzioł, że ón jednako żyje. -Cooo, żyje? -A umrził drugi Czyż. Jakby Marek poszoł na tyn pogrzyb to by nieświadómie pożegnoł ale imiynnika (ale sie nie wyrobił i widzioł yno jego grób blisko kościelnej ściany kaj sie pomodlił za niego).

Trefił na umrzitego

Uż w Sylwestra kansi w sklepie Marek trefił na … Ryśka pisowca. Dziwoł sie na niego jak na zmartwychwstałego. A jakby mu Zbyszek tego nie prawił, tak rzecz jasno ujrzołby … nieboszczyka.

-To bych sie chyba przewrócił z wrażynio – Marek na to i chyba bych w szoku dumoł co tu nie gro? A zdo sie że takich jak Marek, ale co sie nie dowiedzieli na czas a może aż do teraz – je wiyncyj.

Dwa faroże taki same

Tadeuszu, aleś zrobił zadyme. A jeszcze obdzwónił wszystki znajóme dziołchy. Faroż Tadeusz osobiście pochowoł Ryśka PISowca. Jaki faroż?

Pore roków tymu jedna nauczycielka jak go uwidziała w kościele w Zybrzidowic kole kónfesjónału tak chciała coby jóm … wyspowiadoł. Kapke sie zawahoł czy mo w nim siednóć ale pedzioł tej pokornej grzesznicy, że teraz musi iść na probostwo.

To ni ma żodno heca. Była przekónano, że je to faroż Wiesiek Bajger, rdzynny Zybrzidowian, co proboszczowoł wtedy pore wiosek dalij w Zabłociu. Oba óni sóm moc podobni choćby przez to, że se wyglóndajóm na takich co sie im dobrze powodzi. Znaczy majóm troskliwe kuchorki co im moc dogodzajóm.

Król i prorok w jednym?

Mało brakowało a najstarszy w Europie fórt czynny lektor szkolny i dziynnikorz Zbyszek też by sie smucił na ostatnij ceście Ryśka pisowca, kierymu mioł cosi do wyboczynio. A tyn może se wtynczas w najlepsze cosi zajadoł i popijoł?

Uwidzymy, kto dożyje, czy oprowdy Janusz je nie yno królym ale i prorokiym, i synior Rysiek kiery był umrzity jeszcze roki pocióngnie …

też zdezoriyntowany profesor Zbyszek